Разгледување и споделување презентации на Slideshare
Иако Slideshare е многу корисен сервис за промоција на вашите презентациски материјали онлајн, сепак тоа не значи дека неговата намена се ограничува на објавување и уредување презентации. На Slideshare може да најдете огромен број интересни и корисни презентации, кои понатаму може да ги користите за свои цели и потреби, како и да ги преземате локално на вашиот компјутер. Во лентата со опции над секоја презентација ќе го најдете копчето Download и откако ќе го кликнете, ќе може да ја зачувате одбраната презентација на вашиот компјутер.
Ќе претпоставиме дека веќе ги поставивте и уредивте вашите презентации на Slideshare. За да ги споделувате презентациите, едноставно кликнете на некоја, по што ќе забележите дека над неа и од нејзината лева страна има повеќе копчиња.
Првата опција во горниот ред ви овозможува праќање на презентацијата по пат на електронска пошта. Кликнете на Email и внесете ја имејл-адресата или корисничкото име на вашиот пријател кому сакате да му ја пратите презентацијата и кратка порака со која ќе го запознаете примачот со темата на вашата презентација.
Следната опција, Favorite, ви овозможува да ја додадете презентацијата меѓу вашите омилени. Може да впишете неколку клучни зборови и краток коментар за презентацијата, а потоа одберете Post.
Со помош на опцијата Embed може да го земете (copy) кодот за презентацијата и да го залепите (paste) на вашиот веб-сајт или блог.
Копираниот код треба да го пренесете во HTML делот на постот што го уредувате, во чии рамки сакате да ја вгнездите и вашата презентација. Поставете го кодот на саканото место и зачувајте ги промените. Вашата објава, покрај останатите елементи кои претходно сте ги вклучиле, ќе ја содржи и презентацијата од Slideshare.
Последната опција од горната лента е можноста за праќање на презентацијата до некоја група или настан на Slideshare. Кликнете на More и потоа одберете ја групата или настанот кон кои сакате да ја приклучите вашата презентација. Напишете кратка порака, а потоа кликнете на Send и презентацијата ќе биде испратена.
Од левата страна на презентацијата се сместени опциите за брзо споделување на презентацијата на социјални мрежи и блогови. Во вид на копчиња се поставени Facebook и Twitter и блог-платформите Blogger и WordPress. Ако сакате да ја споделите презентацијата на некој друг социјален медиум или блог, одберете More options и во скокачкиот прозорец пронајдете го сервисот што го барате.
http://akcija.mk/razgleduvane-i-spodeluvane-prezentatsii-na-slideshare/Споделување презентации на интернет